पश्चिमी वायुको आंशिक प्रभाव, हिमाली र पहाडी भू-भागमा हल्का वर्षा र हिमपातको सम्भावना

देशमा अहिले पश्चिमी वायुको आंशिक प्रभाव रहेको मौसम पूर्वानुमान महाशाखाले जनाएको छ। यसका कारण देशका हिमाली तथा पहाडी भू-भागमा आंशिक बदली भएको छ।

महाशाखाका अनुसार हाल कोशी, बागमती र गण्डकी प्रदेशका हिमाली र पहाडी भू-भागका साथै कर्णाली र सुदूरपश्चिम प्रदेशका हिमाली भू-भागमा आंशिक बदली छ। देशका बाँकी भागमा मौसम मुख्यतया सफा छ।

सोमबार देशका पहाडी र हिमाली क्षेत्रका केही स्थानमा हल्का वर्षा तथा हिमपात हुने सम्भावना रहेको महाशाखाले जनाएको छ। तर देशका अधिकांश भागमा भने सामान्यतया मौसम सफा रहने पूर्वानुमान गरिएको छ।

दसैँका बेला उच्च पहाडी र हिमाली क्षेत्रमा यात्रा गर्नेहरूले मौसमको जानकारी लिएर मात्र यात्रा गर्न सकिन्छ।