विपद्का बीच पनि सेप्टेम्बरमा पर्यटक आगमन बढ्यो, चिनियाँ पर्यटक दोब्बर

विपद्का बाबजुद सन् २०२६ को सेप्टेम्बर महिनामा हवाई मार्गबाट नेपाल आउने विदेशी पर्यटकको सङ्ख्या बढेको छ। नेपाल पर्यटन बोर्डका अनुसार गत महिना करिब ८८ हजार २ सय पर्यटक भित्रिएका छन्। यो सङ्ख्या गत वर्षको सोही महिनाको करिब ७८ हजार ७ सयभन्दा झन्डै १२ प्रतिशत बढी हो।

भोटेकोशीको बाढी र असोज ८ देखि ११ गतेसम्मको वर्षाले आगमन घट्ने चिन्ता भए पनि सङ्ख्या बढेको हो। चिनियाँ पर्यटक गत वर्षको करिब ५ हजार २ सयबाट दोब्बरभन्दा बढी भएर करिब ११ हजार २ सय पुगेका छन्। करिब १७ हजार ४ सय पर्यटकसहित भारत पहिलो स्रोत मुलुक बनेको छ।

श्रीलङ्काबाट करिब ७ हजार १ सय, बङ्गलादेशबाट झन्डै ४ हजार र जापानबाट करिब २ हजार पर्यटक आएका छन्। दक्षिण एसियाली मुलुकबाट आएका करिब ३० हजार पर्यटक कुल आगमनको करिब ३४ प्रतिशत हुन्। चीन र जापानसहित अन्य एसियाली मुलुकबाट करिब १९ हजार ९ सय पर्यटक आएका छन्, जुन गत वर्षभन्दा झन्डै ५८ प्रतिशत बढी हो।

परम्परागत बजार युरोपबाट भने आगमन झन्डै ९ प्रतिशत घटेर करिब १५ हजार १ सयमा झरेको छ। अमेरिकी महादेशबाट पनि गत वर्षको करिब ११ हजार ५ सयको तुलनामा यस पटक करिब १० हजार १ सय पर्यटक मात्र आएका छन्।