दसैँमा तोकिएभन्दा बढी भाडा लिए कारबाही हुने, यातायात व्यवसायी महासंघको चेतावनी

नेपाल यातायात व्यवसायी राष्ट्रिय महासंघले चाडपर्वको समयमा तोकिएकोभन्दा बढी सवारी भाडा नलिन सम्बद्ध सबैलाई आग्रह गरेको छ।

महासंघका महासचिव डेकनाथ गौतमका अनुसार सरकारले तोकेकोभन्दा बढी भाडा लिने सवारीसाधनलाई कारबाही गरिनेछ। दसैँ नजिकिँदै गर्दा घर जाने यात्रुको चाप बढ्ने भएकाले महासंघले यातायात व्यवसायीलाई यस्तो आग्रह गरेको हो।

दसैँका लागि अग्रिम टिकट बुकिङ खुला हुन लागेका बेला महासंघले यो आग्रह गरेको हो। चाडपर्वको समयमा सरकारले तोकेको भाडादर पालना गर्नुपर्ने महासंघको भनाइ छ।

महासंघले भाडासम्बन्धी नियम उल्लङ्घन गर्नेलाई कारबाही हुने भन्दै सम्बद्ध सबै पक्षलाई सचेत गराएको छ।