प्रस्तावित १३ राजदूतको संसदीय सुनुवाइ असोज २६ देखि २८ सम्म, दसैँअघि नै सक्ने

संसदीय सुनुवाइ समितिले १३ देशका लागि प्रस्तावित राजदूतको सुनुवाइ असोज २६ देखि २८ गतेसम्म गर्ने निर्णय गरेको छ। मङ्गलबार सिंहदरबारमा बसेको बैठकले सचिवालयले प्रस्ताव गरेको तीनदिने तालिका स्वीकृत गरेको हो। समितिले असोज २९ गते प्रतिवेदन तयार पारी सिफारिस गर्ने कार्ययोजना बनाएको छ।

सभापति बोधनारायण श्रेष्ठका अनुसार प्रस्तावित राजदूतविरुद्ध ७ उजुरी परेका छन्, जसमध्ये २ सबैविरुद्ध र ५ एक-एक व्यक्ति लक्षित छन्। सामान्य उजुरी भएकाको सुनुवाइ २६ र २७ गते तथा गम्भीर उजुरी भएकाको २८ गते हुनेछ; उपसमिति आवश्यक परे त्यस्ता सुनुवाइ दसैँपछि हुने सभापति श्रेष्ठले बताउनुभएको छ। चाडपर्व र जिल्ला भ्रमणका कारण केही सांसदले सुनुवाइ दसैँपछि गर्न माग गरे पनि कूटनीतिक नियोगमा राजदूत अभावलाई ध्यानमा राखी छिटो सक्ने सहमति भएको छ।

मन्त्रिपरिषद्ले असोज २ गते भारतका लागि डा. निश्चलनाथ पाण्डे, चीनका लागि डा. कल्याणराज शर्मा र अमेरिकाका लागि चिरनजंग थापालगायतलाई सिफारिस गरेको थियो।

समितिले अनुमोदन गरेपछि राष्ट्रपतिले राजदूत नियुक्त गर्ने व्यवस्था छ।