गल्छी–स्याफ्रुबेँसी सडकमा असोजभित्रै यातायात सञ्चालन गर्ने तयारी

सडक विभागले बाढीबाट क्षतिग्रस्त धादिङको गल्छीदेखि रसुवाको स्याफ्रुबेँसीसम्मको सडकमा असोज महिनाभित्रै सवारी चलाउने लक्ष्यसहित मर्मत तीव्र पारेको छ। विभागका महानिर्देशक डा. विजय जैसीले दसैँसम्म पूरै खण्डमा यातायात सञ्चालन गर्ने गरी काम भइरहेको बताउनुभएको छ।

धादिङ र नुवाकोट जोड्ने कोल्पुखोलामा अस्थायी मर्मतपछि सवारी चल्न थालेको छ भने स्थायी मर्मतको ठेक्का पाएका निर्माण व्यवसायीले काम सुरु गरिसकेका छन्। रातोमाटेमा बाढीले क्षति पुर्‍याएको करिब २०० मिटर सडक ब्याक कटिङ गरेर खोलिएको छ। नुवाकोटको देवीघाटमा अस्थायी पुल जडान गरेपछि गल्छीदेखि विदुरसम्म यातायात सुचारु भएको छ।

विदुर–बेत्रावती खण्डमा अवरुद्ध करिब ३०० मिटर सडकमा नेपाली सेनाले ब्लास्टिङ गरेर ट्र्याक खोल्न थालेको छ। रसुवाको बेत्रावतीमा बेलीब्रिज राख्न जग निर्माण सुरु भएको छ भने स्याफ्रुबेँसीमा अर्को बेलीब्रिज जडानको तयारी भइरहेको छ। बेत्रावतीदेखि धुन्चे हुँदै स्याफ्रुबेँसीसम्मको सडक भने सञ्चालनयोग्य छ।

स्याफ्रुबेँसीदेखि रसुवागढीसम्मको खण्ड पूर्ण रूपमा क्षतिग्रस्त भएकाले त्यहाँ नयाँ सडक बनाउन सर्वेक्षण सुरु भएको छ। सरकारले यस क्षेत्रमा स्थायी सडक निर्माण गर्ने तयारी पनि गरेको छ।