भोटेकोशी बाढीपछिको पुनर्निर्माणमा नेपाल–ईयू सहकार्य बढाउने प्रतिबद्धता

परराष्ट्रमन्त्री शिशिर खनाल र युरोपेली संघकी कार्यकारी उपाध्यक्ष टेरेसा रिबेराबीच न्युयोर्कमा भेटवार्ता हुँदा भोटेकोशी बाढीपछिको पुनर्निर्माणमा सहकार्य बढाउने विषयमा छलफल भएको छ। संयुक्त राष्ट्रसंघको ८१औँ महासभाका अवसरमा उक्त द्विपक्षीय भेट राष्ट्रसंघ मुख्यालयमा भएको हो। मन्त्री खनालको सचिवालयका अनुसार उहाँले भोटेकोशी बाढीपछि नेपालले भोगेको कठिन अवस्थाप्रति रिबेराले पठाएको संवेदना र ऐक्यबद्धताको सन्देशका लागि आभार प्रकट गर्नुभएको छ।

भदौ १० गते आएको उक्त बाढीलाई जलवायु परिवर्तनबाट सिर्जित विपद्का रूपमा उल्लेख गरिएको छ। छलफल विशेषगरी प्रभावित क्षेत्रको पुनरुत्थान, पुनःस्थापना र पुनर्निर्माणमा युरोपेली संघसँगको सहकार्य अझ सुदृढ पार्नेमा केन्द्रित भएको छ। दुवै पक्षले नेपाल र युरोपेली संघबीचको बहुआयामिक साझेदारीका विभिन्न पक्षमा विचार आदानप्रदान गरेका छन्।

लामो समयदेखिको साझेदारी अझ गहिरो र प्रभावकारी बनाउने प्रतिबद्धता पनि भेटमा दोहोर्‍याइएको छ। परराष्ट्रमन्त्री खनाल परराष्ट्र सचिव अमृतबहादुर राईसहितको टोली लिएर आइतबार नै न्युयोर्क प्रस्थान गर्नुभएको थियो र अहिले विभिन्न कूटनीतिक भेटघाटमा व्यस्त हुनुहुन्छ।