कांग्रेसका ४ जिल्ला सभापतिको जिम्मेवारी खोसियो, शनिबारदेखि वडा अधिवेशन

नेपाली कांग्रेसले अधिवेशन प्रक्रिया अघि बढाउन नमानेका ४ जिल्ला सभापतिको जिम्मेवारी खोसेको छ। निवर्तमान सभापति शेरबहादुर देउवानिकट मानिएका बागलुङका जित शेरचन, मुगुका ऐनबहादुर शाही, कञ्चनपुरका पदम बोगटी र डोटीका नरेन्द्रबहादुर सिंह यसमा पर्नुहुन्छ। उहाँहरूलाई सभापति पदबाट भने हटाइएको छैन।

ती जिल्लामा अधिवेशन गराउने जिम्मेवारी बागलुङमा तारानाथ पौडेल, मुगुमा हरिजङ्ग शाही, कञ्चनपुरमा हरिचन्द्र राना र डोटीमा नारायणबहादुर बलायरलाई दिइएको छ। बझाङका सभापति खड्कबहादुर बोहराले भने अधिवेशनको काम अघि बढाउन सहमति जनाएकाले उहाँलाई जिम्मेवारीमै राखिएको कार्यवाहक मुख्यसचिव कृष्णप्रसाद दुलालले जानकारी दिनुभएको छ। पार्टीले यिनै ४ सहित ५ जिल्लाका सभापतिलाई क्रियाशील सदस्यताबापत उठेको रकम केन्द्रीय कार्यालयको बैंक खातामा जम्मा गर्न पत्र पनि पठाएको छ।

पार्टीको १५औँ महाधिवेशनअन्तर्गत शनिबार र आइतबार, अर्थात् असोज ३ र ४ गते देशभर वडा अधिवेशन हुँदै छ। पुस २०८२ मसान्तसम्म सदस्यता नवीकरण गरेका क्रियाशील सदस्य आफ्नो वडाको अधिवेशनमा सहभागी हुनेछन्। वडा अधिवेशनले सभापति, १ महिलासहित २ उपसभापति, सचिव र सहसचिव चुन्नेछ।

महाधिवेशन असोज १६ देखि १९ गतेसम्म काठमाडौँमा हुने कार्यतालिका छ। यसैबीच पूर्वउपसभापति धनराज गुरुङले पनि सभापति गगन थापा नेतृत्वको महाधिवेशन प्रक्रियामा सहभागी हुने निर्णय गर्नुभएको छ।