पार्टी पुनर्गठन कार्यदलमा ओलीले हस्तक्षेप गरे: योगेश भट्टराईको आरोप

नेकपा एमालेका नेता योगेश भट्टराईले पार्टी पुनर्गठनका लागि बनेको कार्यदलको काममा अध्यक्ष केपी शर्मा ओलीले हस्तक्षेप गरेको आरोप लगाउनुभएको छ। शुक्रबार काठमाडौँमा रिपोर्टर्स क्लबको कार्यक्रममा उहाँले यस्तो बताउनुभएको हो। निर्वाचन समीक्षा र पुनर्गठनको प्रस्ताव तयार पार्न गठित कार्यदलको सहमतिअनुसार महासचिव शंकर पोखरेलले प्रतिवेदन लेखेर सदस्यलाई अध्ययनका लागि दिएको उहाँले बताउनुभएको छ।

तर अध्यक्ष ओली असहमत भएपछि त्यसमाथि छलफल अघि बढ्न नसकेको र जवाफमा उपाध्यक्ष रामबहादुर थापालाई अर्को प्रतिवेदन तयार पार्न लगाइएको उहाँको दाबी छ। देशभरका सदस्य, प्रदेश कमिटी, जनसङ्गठन र वरिष्ठ नेताबाट आएका सुझावमा पार्टी पुनर्गठन हुनुपर्ने साझा माग उठेको उहाँको भनाइ छ। एमाले यथास्थितिमा अघि बढ्न नसक्ने भन्दै उहाँले नीति, सङ्गठनको ढाँचा, कार्यशैली र बोलीवचनको पुनरावलोकनसँगै नेतृत्व हस्तान्तरणमार्फत पार्टीको पुनर्जागरण गर्नुपर्नेमा जोड दिनुभएको छ।

पछिल्लो १ वर्षको समग्र समीक्षा गरी जनतासँगको सम्बन्ध कहाँ टुट्यो भनेर पहिल्याउनुपर्ने उहाँको धारणा छ। युवा किन पार्टीमा आएनन् भन्ने विश्लेषण गरेर गल्ती सच्याउनुपर्ने पनि उहाँले बताउनुभएको छ। करिब ६ महिना पुग्न लागेको सरकारले पूरा ५ वर्ष काम गरोस् र अर्को अस्थिरता नआओस् भन्ने चाहना रहे पनि त्यसको गति र मति सही बाटोमा नदेखिएको भट्टराईको टिप्पणी छ।

सरकारमा भय र आतङ्क सिर्जना गरेर शासन गर्ने प्रवृत्ति देखिएको आरोप पनि उहाँले लगाउनुभएको छ।