सिद्धार्थ राजमार्ग र नारायणगढ–मुग्लिनसहित थप सडकमा राति सवारी रोक

भारी वर्षाको जोखिम देखाउँदै विभिन्न जिल्ला प्रशासनले राजमार्ग र लोकमार्गमा रातिको सवारी आवागमन रोकेका छन्। पाल्पा प्रशासनले सिद्धार्थ राजमार्गको बुटवल–दोभान खण्डअन्तर्गत सिद्धबाबा क्षेत्रमा असोज १२ गतेसम्म हरेक साँझ ७ बजेदेखि बिहान ५ बजेसम्म गाडी चलाउन रोक लगाएको छ। सहायक प्रमुख जिल्ला अधिकारी राजेश पन्थीका अनुसार पहिरोको उच्च जोखिम रहेको सिद्धबाबा खण्डमा यात्रु र सवारीसाधनको सुरक्षाका लागि यो निर्णय गरिएको हो।

चितवन प्रशासनले नारायणगढ–मुग्लिन सडक र पृथ्वी राजमार्गको चितवन क्षेत्रमा बिहीबार राति ८ बजेदेखि शुक्रबार बिहान ५ बजेसम्म आवागमन बन्द गरेको छ। चितवनका प्रमुख जिल्ला अधिकारी गणेश अर्यालले रातभर वर्षा र पहिरो जारी रहे नयाँ सूचना निकालिने बताउनुभएको छ। धादिङ प्रशासनले यात्रुलाई मौसम र सडकको अवस्था बुझेर मात्र यात्रा गर्न आग्रह गरेको छ।

उदयपुर प्रशासनले सिद्धिचरण लोकमार्गको कटारी–घुर्मी र सगरमाथा लोकमार्गको साउने–रसुवा खण्डमा असोज १२ गतेसम्म साँझ ५ बजेदेखि बिहान ५ बजेसम्म सवारी रोकेको छ। स्याङ्जामा सिद्धार्थ राजमार्गमा असोज ११ गतेसम्म साँझ ७ देखि बिहान ५ बजेसम्म अत्यावश्यकबाहेकका गाडी चल्न पाउने छैनन्। स्याङ्जाका अन्य शाखा सडकमा भने साँझ ६ देखि बिहान ७ बजेसम्म रोक छ।

बेनी–जोमसोम र बेनी–दरवाङ सडकमा पनि राति यातायात सञ्चालन रोकिएको छ। खोटाङमा मध्यपहाडी लोकमार्गको चखेवाभञ्ज्याङ–जयरामघाट खण्डमा साँझ ७ देखि बिहान ५ बजेसम्म अत्यावश्यक सेवाबाहेकका सवारी चल्न पाउने छैनन्। उदयपुरका आठवटै स्थानीय तहले विद्यालय बन्द गरेका छन्।