स्थानीय तहका कर्मचारीलाई असोज ९–११ बिदामा नबस्न निर्देशन

भूमि व्यवस्था, सहकारी, संघीय मामिला तथा सामान्य प्रशासन मन्त्रालयले देशभरका स्थानीय तहका कर्मचारीलाई असोज ९ देखि ११ गतेसम्म बिदामा नबस्न निर्देशन दिएको छ। यही अवधिमा देशका विभिन्न भागमा अत्यधिक वर्षा हुने पूर्वानुमानका आधारमा मन्त्रालयले सबै स्थानीय तहलाई उच्च सतर्कतामा रहन पत्र पठाएको हो। मन्त्रालयको विपद् व्यवस्थापन तथा सामाजिक समावेशीकरण शाखाले मौसम विज्ञान विभाग र राष्ट्रिय विपद् जोखिम न्यूनीकरण तथा व्यवस्थापन प्राधिकरणको सूचनालाई आधार बनाएको छ।

पत्रमा प्रमुख प्रशासकीय अधिकृतहरूलाई मन्त्रालयसँग निरन्तर सम्पर्कमा रहन भनिएको छ। जोखिमयुक्त बस्तीका नागरिकलाई सुरक्षित ठाउँमा सार्ने प्रबन्ध मिलाउन मन्त्रालयले आग्रह गरेको छ। आवश्यक परे विद्यालय र सामुदायिक भवनलाई अस्थायी आश्रयस्थल बनाउन तयार राख्न भनिएको छ।

जल तथा मौसम विज्ञान विभागका अनुसार शुक्रबार लुम्बिनी र गण्डकी प्रदेशका एक-दुई स्थानमा अति भारी वर्षाको सम्भावना छ। कोशी, बागमती र कर्णाली प्रदेशका थोरै स्थानमा पनि भारीदेखि धेरै भारी वर्षा हुन सक्ने विभागको पूर्वानुमान छ। मधेश प्रदेशका एक-दुई स्थानमा भारी वर्षा र तराईका केही स्थानमा हावाहुरी चल्ने सम्भावना छ।

विभागका अनुसार काठमाडौँमा मेघगर्जनसहित भारी वर्षाको ८० प्रतिशत सम्भावना र तापक्रम १८ देखि २० डिग्री सेल्सियस रहनेछ।