दैनिक उपभोग्य वस्तुको आपूर्ति सहज, अधिक सञ्चय नगर्न सरकारको आग्रह

सरकारले दैनिक अत्यावश्यक उपभोग्य वस्तुको आपूर्ति सहज रहेको भन्दै उपभोक्तालाई आवश्यकताभन्दा बढी सामान किनेर नथुपार्न आग्रह गरेको छ। उद्योग, वाणिज्य तथा आपूर्ति मन्त्रालयका प्रवक्ता जितेन्द्र बस्नेतले बिहीबार जारी गर्नुभएको विज्ञप्तिअनुसार सार्क खाद्य सुरक्षा बैंक र राष्ट्रिय खाद्य सुरक्षा भण्डार दुवैमा पर्याप्त खाद्यान्न मौज्दात छ। असोज ११ गतेसम्म देशका विभिन्न भागमा भारी वर्षाको सम्भावना र नजिकिँदो चाडपर्वलाई ध्यानमा राखेर मन्त्रालयले यो तयारी गरेको हो।

बजारमा खाद्यान्नलगायतका सामानको बिक्रीवितरण सहज रूपमा भइरहेको मन्त्रालयले जनाएको छ। आपूर्ति व्यवस्था बलियो बनाउन सरकारी र निजी क्षेत्रका संस्था तथा व्यवसायीसँग निरन्तर समन्वय भइरहेको छ। बाढी वा पहिरोले मुख्य राजमार्ग वा आपूर्ति मार्ग अवरुद्ध भएमा वैकल्पिक बाटोबाट ढुवानी जारी राखिने मन्त्रालयले जनाएको छ।

चाडपर्व र विपद्को फाइदा उठाउँदै हुने कार्टेलिङ, सिन्डिकेट, कालोबजारी र कृत्रिम अभाव रोक्न बजार अनुगमन कडा पारिएको छ। प्रधानमन्त्रीले संयुक्त राष्ट्रसङ्घको महासभामा सहभागी हुन अमेरिका जानुअघि दिएको निर्देशनअनुसार मन्त्रालयहरू विपद् पूर्वतयारीमा जुटेका छन्। कार्यवाहक प्रधानमन्त्री एवं अर्थमन्त्री डा.

स्वर्णिम वाग्लेले सम्बद्ध मन्त्रीहरूसँग छलफलपछि सबै मन्त्रालय र मातहतका निकायलाई उच्च सतर्कतासहित परिचालन गरिएको बताउनुभएको छ। उहाँले स्थानीय तहलाई विपद्पछिको प्रतिकार्यमा आफ्नो स्रोत खर्च गर्न नहिचकिचाउन आग्रह गर्नुभएको छ।