कांग्रेसको वडा अधिवेशन आज र भोलि, तोकिएकै मितिमा गर्न निर्देशन

नेपाली कांग्रेसको पन्ध्रौँ महाधिवेशनअन्तर्गत वडा तहको अधिवेशन असोज ३ र ४ गते, शनिबार र आइतबार देशभर हुँदै छ। पार्टीको केन्द्रीय निर्वाचन समितिले अफवाह र भ्रामक सूचनाको पछि नलागी तोकिएकै मितिमा अधिवेशनमा सहभागी हुन सबै क्रियाशील सदस्य, तह र निकायलाई निर्देशन दिएको छ। समितिका सदस्य सचिव राजु कटुवालले शुक्रबार जारी गर्नुभएको विज्ञप्तिअनुसार ७७ वटै जिल्लामा निर्वाचन अधिकृत खटिएर काम सुरु गरिसकेका छन्।

ती अधिकृतले जिल्ला र स्थानीय पदाधिकारीसँग छलफल गरी वडा तहमा मतदान अधिकृत खटाउने तयारी सकेको समितिले जनाएको छ। कार्यसमितिले तोकेअनुसार मुख्य महाधिवेशन असोज १६ देखि १९ गतेसम्म काठमाडौँमा हुने कार्यतालिका छ। नवलपरासी पूर्वमा करिब ९२ वडामा शनिबार अधिवेशन हुने र मतदान अधिकृतसहितको टोली खटाइसकिएको जिल्ला कांग्रेसले जनाएको छ।

त्यहाँ करिब १२ हजार क्रियाशील सदस्यले वडा समिति र क्षेत्रीय प्रतिनिधि चयन गर्ने कार्यक्रम छ। केन्द्रीय निर्वाचन समितिले जिल्लामा अधिवक्ता निर्भयराज पौडेललाई निर्वाचन अधिकृत खटाएको छ। यसबीच, पूर्वसभापति शेरबहादुर देउवा पक्षले २०८२ पुसको विशेष महाधिवेशनबाट सभापति बनेका गगन थापाको नेतृत्व अझै स्वीकार गरेको छैन।

नेता रमेश लेखकले पार्टी एकताका लागि थापाले देउवासँग संवाद गर्नुपर्ने बताउनुभएको छ।