मन्त्रिपरिषद्का अन्य निर्णय: नागरिकता नियमावली संशोधन स्वीकृत, जानकी मन्दिर संरक्षित स्मारक क्षेत्र

मन्त्रिपरिषद्को शुक्रबारको बैठकले १३ देशमा नेपाली राजदूत नियुक्तिका लागि नाम सिफारिस गरेको छ। सरकारका प्रवक्ता एवं शिक्षामन्त्री सस्मित पोखरेलका अनुसार सिफारिस गरिएका नाम संसदीय सुनुवाइका लागि संसद्‌मा पठाइनेछ। भारतका लागि निश्चलनाथ पाण्डे, चीनका लागि कल्याणराज शर्मा र अमेरिकाका लागि चिरनजंग थापाको नाम सिफारिस भएको छ।

पूर्वप्रधानसेनापति गौरव शमशेर जंगबहादुर राणालाई बेलायतका लागि सिफारिस गरिएको छ। बैठकले नेपाल नागरिकता (पाँचौँ संशोधन) नियमावली, २०८३ पनि स्वीकृत गरेको छ। नेपाल सरकार (कार्य विभाजन) नियमावली, २०८३ संशोधन गरी नेपाल मौसम विज्ञान विभागलाई कृषि, वन तथा वातावरण मन्त्रालयबाट ऊर्जा, जलस्रोत तथा सिँचाइ मन्त्रालयअन्तर्गत सारिएको छ।

सहसचिव रुद्रसिंह तामाङ राजपत्राङ्कित विशिष्ट श्रेणीको सचिव पदमा बढुवा हुनुभएको छ। यसैबीच सरकारले जनकपुरको जानकी मन्दिरलाई प्राचीन स्मारक संरक्षण ऐन, २०१३ अन्तर्गत संरक्षित स्मारक क्षेत्र घोषणा गरेको छ। संस्कृति, पर्यटन तथा नागरिक उड्डयन मन्त्रालयका सचिव मुकुन्दप्रसाद निरौलाका अनुसार परिक्रमा मार्गलाई आधार मानेर क्षेत्रको चार किल्ला तोकिएको छ।