साइबर ठगी रोक्न बैंक र वालेटले २४ घण्टा उपलब्ध सम्पर्क अधिकृत तोक्नुपर्ने: राष्ट्र बैंक

नेपाल राष्ट्र बैंकले साइबर ठगी नियन्त्रणका लागि विकास बैंक, वित्त कम्पनी र भुक्तानी सेवा प्रदायकलाई चौबीसै घण्टा उपलब्ध हुने सम्पर्क अधिकृत तोक्न निर्देशन दिएको छ। राष्ट्र बैंकको भुक्तानी प्रणाली विभागले जारी गरेको सूचनामा भुक्तानी प्रणाली सञ्चालकलाई पनि यही निर्देशन छ। गृह मन्त्रालयको निर्णयबाट स्वीकृत एकीकृत साइबर स्क्याम प्रतिकार्य केन्द्रसम्बन्धी दिग्दर्शनअनुसार यो व्यवस्था गरिएको राष्ट्र बैंकले जनाएको छ।

तोकिएका अधिकृतले साइबर ठगीका घटनामा नेपाल प्रहरीको साइबर ब्युरोसँग समन्वय र सहकार्य गर्नेछन्। वाणिज्य बैंकहरू तथा डिजिटल वालेट ई-सेवा र खल्तीका प्रतिनिधि उक्त केन्द्रमा भौतिक रूपमै रहेर समन्वय गर्ने व्यवस्था छ। त्यसैले तीबाहेकका विकास बैंक, वित्त कम्पनी र अन्य भुक्तानी सेवा प्रदायकबाट सम्पर्क अधिकृत मागिएको हो।

सम्बन्धित संस्थाले अधिकृतको पूरा नाम, फोन नम्बर र कार्यालयको इमेल ठेगाना विभागलाई आधिकारिक इमेलमार्फत तुरुन्तै पठाउनुपर्नेछ। ती अधिकृतले साइबर अपराधको अनुसन्धान र तत्काल प्रतिकार्यमा सहयोग गर्नुपर्नेछ। डिजिटल भुक्तानीको विस्तारसँगै अनलाइन ठगी, खाता ह्याकिङ र अवैध रकम ओसारपसारका घटना बढेका छन्।

यस्ता घटनामा छिटो कारबाही गर्न तथा पीडितको रकम रोक्का र फिर्ता गर्ने काम सहज बनाउन प्रहरी र वित्तीय क्षेत्रबीच यो संयन्त्र बनाइएको राष्ट्र बैंकले जनाएको छ।