असोज २२–२३ मा विराटनगरमा सातै प्रदेशका मुख्यमन्त्रीको सम्मेलन

कोशी प्रदेश सरकारको आयोजनामा असोज २२ र २३ गते विराटनगरमा सातै प्रदेशका मुख्यमन्त्रीहरूको सम्मेलन हुने भएको छ। सम्मेलनमा संघीयता कार्यान्वयनमा देखिएका चुनौती, प्रदेशहरूले अपनाएका असल अभ्यास तथा संघ, प्रदेश र स्थानीय तहबीचको समन्वयबारे छलफल हुनेछ। अन्तरप्रदेश सहकार्य र बहुप्रदेश साझेदारी पनि सम्मेलनको एजेन्डामा छ।

कोशीका मुख्यमन्त्री हिक्मतकुमार कार्कीले प्रदेशका साझा समस्या पहिचान गरी आर्थिक समृद्धि र सुशासनको बाटो तय गर्न सम्मेलन गर्न लागिएको बताउनुभएको छ। समस्या समाधानका लागि प्रदेशहरूबीच आपसी समन्वय बढाउनु पनि सम्मेलनको उद्देश्य भएको उहाँको भनाइ छ। उहाँले अन्तरप्रदेश व्यापार र उत्पादनको आदानप्रदानको विषय पनि उठाउनुभएको छ।

सम्मेलनको तयारी र समन्वयको जिम्मा कोशी प्रदेश योजना आयोगलाई दिइएको छ। मुख्यमन्त्रीका आर्थिक सल्लाहकार मोहन सुवेदीका अनुसार सातै प्रदेशका मुख्यमन्त्रीसँग समन्वय भइसकेको छ।