चाडपर्वपछि सरकारविरुद्ध आन्दोलनमा उत्रिने एमालेको घोषणा

नेकपा एमालेले चाडपर्व सकिनेबित्तिकै सरकारविरुद्ध आन्दोलन सुरु गर्ने घोषणा गरेको छ। पार्टी सचिव महेश बस्नेतले मङ्गलबार च्यासलस्थित केन्द्रीय कार्यालयमा सञ्चारकर्मीलाई यो जानकारी दिनुभएको हो। सरकार महँगी, भ्रष्टाचार र कुशासनमा फसेकाले पार्टी सडकमा उत्रन लागेको उहाँले बताउनुभएको छ।

सचिव बस्नेतका अनुसार हालै सम्पन्न केन्द्रीय कमिटी बैठकले सरकारका जनविरोधी काममा प्रतिवाद गर्ने निर्णय गरेको थियो। सोही बैठकले पार्टी एकता थप बलियो बनाउने जिम्मेवारी दिएको उहाँको भनाइ छ। कार्यकर्तालाई परिचालन गर्ने जिम्मेवारी पनि सोही बैठकले दिएको थियो।

पार्टीले भ्रम चिरेर संगठनलाई थप जुझारु बनाएको पनि उहाँले बताउनुभएको छ। सरकार अधिनायकवादी शैलीमा अघि बढेको उहाँको आरोप छ। अब एमाले चुपचाप हेरेर नबस्ने उहाँले चेतावनी दिनुभएको छ।

मुलुकको अर्थतन्त्र र जनजीविका दयनीय अवस्थामा पुगेको उहाँको दाबी छ। सरकारले हालै गरेका केही गिरफ्तारीलाई बस्नेतले प्रतिशोधको राजनीति भन्नुभएको छ। त्यसलाई उहाँले 'छोरी कुटेर बुहारी तर्साउने' रणनीतिको संज्ञा दिनुभएको छ।

सरकारको आयु अब धेरै बाँकी नरहेको उहाँको तर्क छ।