बाढीपहिरोले पृथ्वी राजमार्गसहित १२ भन्दा बढी सडक अवरुद्ध, हेटौँडा–काठमाडौँका दुई सडक पनि ठप्प

बाढीपहिरोका कारण पृथ्वी राजमार्गसहित मुलुकका १२ वटाभन्दा बढी सडकखण्ड अवरुद्ध भएका छन्। अविरल वर्षाका कारण धादिङको गजुरी गाउँपालिका–२ परेवाभिरमा पृथ्वी राजमार्ग अवरुद्ध भएको छ।

लगातारको वर्षाले पहिरो र लेदो खसेपछि हेटौँडाबाट काठमाडौँ जोड्ने दुईवटा सडकमार्गमा पनि सवारी आवागमन अवरुद्ध भएको छ। कान्तिलोकपथमा पहिरो खसेको छ भने भीमफेदी–कुलेखानी–सिस्नेरी सडक पनि अवरुद्ध छ। हेटौँडा–काठमाडौँ आवागमनका लागि फाखेल सडक र त्रिभुवन राजपथ भने सञ्चालनमा छन्।

मकवानपुरको इन्द्रसरोवर गाउँपालिकाको सिस्नेरीमा शनिबार बिहान करिब १०:३० बजे लेदोसहितको पहिरो खस्दा हेटौँडा–भीमफेदी–दक्षिणकाली सडकखण्ड पूर्ण रूपमा अवरुद्ध भएको छ।

अविरल वर्षा जारी रहँदा देशका विभिन्न भागमा सडक यातायात प्रभावित भएको छ।