एसियाडको करातेमा नेपाल पदकविहीन, एरिका र राकेश कांस्यबाट चुके

जापानको आइची–नागोयामा जारी २०औँ एसियाली खेलकुदको करातेमा नेपालका तीन खेलाडी कांस्य पदकको निर्णायक भिडन्तमा चुकेका छन्। महिला ६८ केजीमाथिको कुमितेमा एरिका गुरुङ साउदी अरबकी दिना अहमद मोस्तफासँग ८–७ को झिनो अन्तरले पराजित भइन्। त्यसअघि सेमिफाइनलमा उनी कजाकस्तानकी सोफिया बेरुल्टसेभासँग २–१ ले हारेकी थिइन्, जहाँ दुई सेकेन्ड बाँकी रहँदा भिडियो रिप्लेमार्फत प्रतिद्वन्द्वीले युकोबाट एक अंक थपेकी थिइन्।

क्वार्टरफाइनलमा एरिकाले जोर्डनकी यारा नासेरलाई ७–१ ले हराएकी थिइन्। उनले १९औँ एसियाली खेलकुदमा नेपालका लागि ऐतिहासिक रजत पदक जितेकी थिइन् र यसपटक उनीबाट स्वर्णको अपेक्षा गरिएको थियो। पुरुष ५५ केजीमुनिको कुमितेमा राकेश मानन्धर कांस्यको खेलमा मलेसियाका कालियाना सुन्दरमसँग ९–१ ले पराजित भए।

सेमिफाइनलमा उनी उज्बेकिस्तानका खुमोयुनमिर्जा खालिमोभसँग ७–० ले हारेका थिए भने क्वार्टरफाइनलमा थाइल्यान्डका खेलाडीलाई हराएका थिए। ६० केजीमुनिको कुमितेमा मीनबहादुर तामाङ साउदी अरबका अल्बासेरसँग २–० ले पराजित हुँदै कांस्यबाट चुके। त्यसअघि उनले प्रिक्वार्टरफाइनलमा हङकङका हिम चाउलाई ४–१ ले हराएका थिए भने सेमिफाइनलमा कुवेतका अब्दुल्लाह शाबानसँग पराजित भएका थिए।

महिला एकल कातामा सानुमाया थिङ कोरियाकी चोइ हेइनसँग पराजित भइन्। उसूतर्फ विजय सिंजाली पनि पदक जित्न असफल भए।