एसियाड महिला भलिबलमा नेपालको पहिलो जित

जापानमा जारी २०औँ एसियाली खेलकुदको महिला भलिबलमा नेपालले किर्गिस्तानलाई सोझो सेटमा हराउँदै प्रतियोगिताको पहिलो जित निकालेको छ। ओकाजाकी चुओ सोगो पार्क जिम्नेसियममा आइतबार भएको वर्गीकरण चरणको खेलमा नेपालले ३–० ले जितेको हो। नेपालले पहिलो सेट २५–२०, दोस्रो सेट २५–१६ र तेस्रो सेट २५–२० ले आफ्नो पक्षमा पारेको छ।

समूह चरणमा आयोजक जापान र इन्डोनेसियासँग लगातार दुई खेल हारेपछि नेपालको क्वार्टरफाइनल यात्रा टुंगिएको थियो। ती दुवै खेलमा नेपाल ३–० कै अन्तरले पराजित भएको थियो। किर्गिस्तानविरुद्धको जितपछि नेपालले अब नवौँदेखि १२औँ स्थानका लागि हङकङसँग प्रतिस्पर्धा गर्नेछ।

समूह चरणका दुवै खेल गुमाएको नेपाल पदकको दौडबाट भने बाहिरिइसकेको छ।