वर्षौँदेखि नवीकरण नगरेका ४६ सय संस्था प्रशासनको निगरानीमा

मोरङमा वर्षौँदेखि नवीकरण नगरी निष्क्रिय रहेका संस्था खोज्न जिल्ला प्रशासन कार्यालयले अभिलेख शुद्धीकरण अभियान सुरु गरेको छ। दर्ता भएका संस्था सञ्चालनमा छन् कि कागजमा मात्र सीमित छन् भनी यकिन गर्न प्रशासनले विवरण अद्यावधिक गर्न दुई महिनाको म्याद तोकेको छ। प्रशासनको अभिलेखअनुसार संस्था दर्ता ऐन, २०३४ अन्तर्गत जिल्लामा करिब ४ हजार ६ सय संस्था दर्ता छन्, जसमध्ये कतिपयले पाँच वर्षभन्दा बढी समयदेखि नवीकरण गरेका छैनन्।

कार्यालयले असोज १२ गते सार्वजनिक सूचना निकालेर दुई वर्षभन्दा लामो समयदेखि नवीकरण नगरेका संस्थालाई आवश्यक कागजात लिएर सम्पर्कमा आउन भनेको छ। म्यादभित्र नआउनेमाथि प्रचलित कानुनबमोजिम कारबाही हुने प्रशासनले जनाएको छ। सहायक प्रमुख जिल्ला अधिकारी पवनराज कोइरालाका अनुसार कति संस्था नियमित सञ्चालनमा छन् र कति निष्क्रिय छन् भन्ने विवरण सङ्कलन भइरहेको छ।