ताप्लेजुङको दोभान बजारमा आगलागी, करिब १० घर जले

ताप्लेजुङको मेरिङदेन गाउँपालिका–३ स्थित दोभान बजारमा बिहीबार दिउँसो आगलागी हुँदा करिब १० घर जलेका छन्। सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार करिब ५० घरधुरी रहेको बाक्लो बस्तीमा आगो फैलिएको हो। आगो निभाउन सशस्त्र प्रहरी बल नेपाल नम्बर १ कञ्चनजङ्घा गुल्मबाट सुरक्षाकर्मी खटाइएको उहाँले बताउनुभएको छ।

प्रमुख जिल्ला अधिकारी उमेशकुमार दाहालका अनुसार नेपाली सेना, नेपाल प्रहरी, सशस्त्र प्रहरी र स्थानीयवासी मिलेर आगो नियन्त्रणको प्रयास गरिरहेका छन्। जिल्ला प्रहरी कार्यालयका प्रमुख डीएसपी कमल बजगाईंका अनुसार घटनास्थलमा दुई वटा दमकल पुगेका छन्। बस्ती झुरुप्प भएकाले आगो निभाउन कठिनाइ भइरहेको उहाँले बताउनुभएको छ।

जिल्लाबाट थप प्रहरी पनि परिचालन गरिएको छ। आगो अन्य घरमा फैलिन नदिन केही घर भत्काउने काम पनि गरिएको प्रहरीले जनाएको छ। आगलागीको कारण अझै यकिन भएको छैन।

विद्युत् सर्ट सर्किटबाट आगो लागेको हुन सक्ने प्रारम्भिक अनुमान प्रहरी र प्रशासनले गरेको छ। तमोर नदी र मैवाखोलाको दोभानमा रहेको यो बजार ताप्लेजुङको दोस्रो ठूलो व्यापारिक केन्द्र हो। बजारका अधिकांश घर काठ र जस्तापाताले बनेकाले आगो छिटो फैलिएको प्रत्यक्षदर्शीले बताएका छन्।

दोभान बजारमा यसअघि पनि ठूलो आगलागी भएको थियो। क्षतिको पूरा विवरण आउन बाँकी छ।