पृथ्वी राजमार्गमा आज राति सवारी आवागमन पूर्ण रूपमा बन्द

भारी वर्षाका कारण बाढी र पहिरोको जोखिम बढेपछि पृथ्वी राजमार्गमा आज राति सवारी आवागमन पूर्ण रूपमा बन्द गरिएको छ। जिल्ला प्रशासन कार्यालय धादिङको सूचनाअनुसार बिहीबार बेलुका ८ बजेदेखि शुक्रबार बिहान ५ बजेसम्म यो राजमार्गमा सबै प्रकारका सवारीसाधनको आवागमनमा रोक लगाइएको छ। धादिङ र आसपासका क्षेत्रमा लगातार पानी परिरहेको र जल तथा मौसम विज्ञान विभागले आगामी केही दिन भारीदेखि अति भारी वर्षाको पूर्वानुमान गरेकाले यो निर्णय गरिएको प्रशासनले जनाएको छ।

बाढी, पहिरो र डुबानबाट हुन सक्ने मानवीय तथा भौतिक क्षति रोक्न र यात्रुको सुरक्षाका लागि राति आवागमन रोकिएको प्रशासनको भनाइ छ। प्रमुख जिल्ला अधिकारी लक्ष्मी पाण्डेय (गौतम) ले यात्रु र चालकलाई मौसम तथा सडकको ताजा अवस्था बुझेर मात्र यात्रा तय गर्न आग्रह गर्नुभएको छ। जोखिम भएका ठाउँमा नजान र सुरक्षा निकायले दिने निर्देशन पालना गर्न पनि प्रशासनले अनुरोध गरेको छ।

जल तथा मौसम विज्ञान विभागका अनुसार भोलि पनि बागमती र गण्डकी प्रदेशका पहाडी भू-भागका अधिकांश स्थानमा मेघगर्जनसहित मध्यमसम्म वर्षाको सम्भावना छ। विभागले काठमाडौँमा आज वर्षाको सम्भावना ७० प्रतिशत रहेको जनाएको छ।