महाकालीको बाढीले दोधारा चाँदनी झोलुङ्गे पुलमा क्षति

महाकाली नदीको बाढीले कञ्चनपुरको दोधारा चाँदनी र भीमदत्तनगर जोड्ने झोलुङ्गे पुलमा ठूलो क्षति पुर्‍याएको छ। आज बिहान नदीको बीचमा गाडिएको एउटा पिलर भत्किँदा पुलको केही अंश पानीमा बगेको छ। पुलका केही भागमा फलामे पाता असामान्य रूपमा माथि उठेको देखिएपछि सुरक्षाका लागि प्रहरीले आवतजावत पूर्ण रूपमा रोकेको छ।

मर्मत सम्पन्न भएपछि मात्र पुल फेरि खोलिने प्रहरीले जनाएको छ। यो पुलले दोधारा चाँदनी नगरपालिकालाई देशका अन्य भागसँग जोड्दै आएको छ। नगरपालिकाका विपद् सम्पर्क व्यक्ति अमृत विकका अनुसार पिलरसँगै पुलको स्पान अर्थात् झुण्डिएको भागमा पनि क्षति पुगेको छ।