भारतमा मतदाता नामावली विवाद: निर्वाचन आयोगबाहिर प्रदर्शन, वामपन्थी नेता हिरासतमा

भारतको राजधानी नयाँदिल्लीमा निर्वाचन आयोगको मुख्यालयबाहिर प्रदर्शन गरिरहेका वामपन्थी दलका नेता तथा कार्यकर्तालाई प्रहरीले हिरासतमा लिएको छ। हिरासतमा पर्नेमा भारतीय कम्युनिस्ट पार्टी मार्क्सवादी अर्थात् सीपीआई–एमका महासचिव एमए बेबी पनि हुनुहुन्छ। सीपीआई–एमएलकी केन्द्रीय समिति सदस्य सुचेता डे र श्वेता राजलाई पनि प्रहरीले नियन्त्रणमा लिएको जनाइएको छ।

प्रदर्शनमा एआईसीसीटीयू, एआईएलएजे लगायत ट्रेड युनियनका नेता–कार्यकर्ता पनि सहभागी थिए। प्रदर्शनकारीले मुख्य निर्वाचन आयुक्त ज्ञानेश कुमारको राजीनामा माग गरेका थिए। सीपीआई–एमले विज्ञप्ति जारी गर्दै प्रहरीले माग सुन्नुको साटो बल प्रयोग गरेको आरोप लगाएको छ।

विवादको केन्द्रमा निर्वाचन आयोगले चलाएको मतदाता नामावलीको विशेष गहन पुनरीक्षण प्रक्रिया छ। सफ्टवेयरको सहायताले ठूलो सङ्ख्यामा मतदाताको नाम हटाइएको आरोप सार्वजनिक भएपछि विपक्षी गठबन्धनले आयोगविरुद्ध मोर्चा खोलेको छ। तीन सदस्यीय आयोगका अन्य दुई आयुक्तको सहमति नलिई प्रमुख आयुक्तले कतिपय परिवर्तन गरेको विभिन्न सञ्चारमाध्यमले उल्लेख गरेका छन्।

युवाहरूको कक्रोच आन्दोलनले पनि आयोगको विरोधमा जेल भरो अभियान घोषणा गरेको छ।