युद्धको असरले इरानी मुद्रा रियाल फेरि कमजोर

मध्यपूर्वमा चलिरहेको युद्धको प्रभावले इरानी मुद्रा रियाल अमेरिकी डलरसँगको विनिमयमा हालसम्मकै न्यून विन्दुमा पुगेको छ। मंगलबार तेहरानमा एक अमेरिकी डलरको विनिमय दर करिब २५ लाख रियाल नाघेको थियो। गत सेप्टेम्बर २ मा यो दर करिब २२ लाख रियाल थियो र एक महिना नबित्दै रियालले अर्को न्यून विन्दु छोएको हो।

युद्ध सुरु भएयता इरानी मुद्रा लगातार दबाबमा छ। इरानी तेलमाथिको अमेरिकी प्रतिबन्धले देशको विदेशी मुद्रा आम्दानीमा असर गरेको छ। युद्धपछि ती प्रतिबन्ध र इरानी तेलमाथिको नाकाबन्दी झन् कडा बनेकाले आर्थिक समस्या बढेको छ।

मुद्रा कमजोर हुँदा आयातित सामान महँगिने र दैनिक उपभोग्य वस्तुको मूल्य बढ्ने जोखिम छ। यसैबीच इरान र अमेरिकाबीच अप्रत्यक्ष वार्ता अघि बढाउने प्रयास भइरहेको छ। होर्मुज जलडमरूमध्यमा तनाव घटाउनेबारे छलफल जारी रहेको जनाइएको छ।