निर्माणाधीन १२ प्रसारण लाइनका अवरोध हटाउन ऊर्जा मन्त्रालयको समन्वय

ऊर्जा, जलस्रोत तथा सिँचाइ मन्त्रालयले निर्माणाधीन १२ वटा प्रसारण लाइन आयोजनामा देखिएका अवरोध हटाउन समन्वय सुरु गरेको छ। बिहीबार मन्त्रालयमा भएको ब्रिफिङमा आयोजना प्रमुखहरूले ऊर्जामन्त्री विराजभक्त श्रेष्ठसामु दुईवटा गुनासो राखेका छन्। उनीहरूका अनुसार वन विभागबाट रूख कटानमा अवरोध भएको छ र सडक विभागले पोल तथा टावर सार्न पर्याप्त समय दिएको छैन।

बैठकमा तुम्लिङटार–सितलपाटी २२० केभी, हेटौंडा–ढल्केबर ४०० केभी, ढल्केबर–बाणगंगा, कोहलपुर–सुर्खेत–दैलेख, नेपालगन्ज–नानपारा, लालबन्दी–सलिमपुर, इनरुवा–विराटनगर र कालीगण्डकी–रिडी १३२ केभीलगायत आयोजनाको प्रगति प्रस्तुत गरिएको थियो। राष्ट्रिय प्रसारण प्रणाली बलियो बनाउन निर्माणाधीन लाइनको वस्तुस्थिति बुझ्न आयोजना प्रमुखहरूलाई बोलाइएको नेपाल विद्युत प्राधिकरणका सञ्चालक समिति सदस्य अंशुकिरण शाहीले बताउनुभएको छ। प्राधिकरणको वितरण तथा ग्राहक सेवा निर्देशनालयका प्रमुख नवराज ओझाका अनुसार अवरोध हुँदाहुँदै पनि सबै १२ आयोजना यसै वर्षभित्र सम्पन्न हुने जानकारी आयोजना प्रमुखहरूले दिएका छन्।

इनरुवा–विराटनगर लाइनमा भने म्याद थप गरिसकेपछि पनि ठेकेदारले काम नगरेको पाइएको छ।