एमालेमा असन्तुष्टि: कर्ण थापाको छुट्टै प्रस्ताव रोकियो, सांसद राईको आलोचना

एमाले केन्द्रीय कमिटी बैठकको पहिलो दिन अध्यक्ष केपी शर्मा ओलीले केन्द्रीय सदस्य कर्ण थापाको छुट्टै प्रस्ताव पेस गर्न रोक्नुभएको छ। थापाको प्रस्तावमा पार्टी पदाधिकारीका लागि ७० वर्षको उमेर हद र २ कार्यकालको सीमा विधानमा फेरि राख्नुपर्ने माग छ। संसदीय निर्वाचनमा लगातार २ पटकभन्दा बढी उम्मेदवार बन्न नपाउने र समानुपातिकतर्फ १ पटक मौका पाइसकेकालाई फेरि नदिने नीति पनि प्रस्तावमा छ।

यो अवधारणा ओलीले नै सातौँ महाधिवेशनमा अघि सारेको र आठौँ तथा नवौँ महाधिवेशनमार्फत अभ्यास भएको प्रस्तावमा उल्लेख छ। बैठकमा केन्द्रीय सदस्य कृष्णगोपाल श्रेष्ठले विगतको अभ्यासअनुसार महासचिव शंकर पोखरेलले बैठक चलाउनुपर्ने माग गर्नुभएको थियो। ओलीले उहाँलाई बोल्न नदिई विधान हेरेर आउन भनेपछि श्रेष्ठ प्रतिवाद गर्दै बैठकबाट बाहिरिनुभएको छ।

संशोधित विधानले बैठक सञ्चालनको अधिकार अध्यक्षलाई दिएको छ, जबकि यसअघि महासचिवले बैठक चलाउने परिपाटी थियो। प्रतिवेदन पेस भएलगत्तै अरू नेतालाई बोल्ने समय नदिई पहिलो दिनको बैठक स्थगित गरिएको थियो। यसैबीच एमाले सांसद राजेन्द्रकुमार राईले ओलीको नेतृत्वमा पार्टी सफल भयो कि भएन भन्ने कुरा 'घामझैं छर्लङ्ग' रहेको टिप्पणी गर्नुभएको छ।

सोमबार संसद भवन बाहिर पत्रकारसँग कुरा गर्दै उहाँले पार्टी खुम्चिनुका कारणबारे तल्लो तहसम्म छलफल गरेर कार्यदलले प्रतिवेदन तयार पारिसकेको बताउनुभएको छ।