एमाले केन्द्रीय कमिटी बैठक सुरु, ओलीको प्रतिवेदनमा नेतृत्व नछाड्ने अडान

नेकपा एमालेका अध्यक्ष केपी शर्मा ओलीले सोमबारदेखि सुरु भएको केन्द्रीय कमिटी बैठकमा राजनीतिक प्रतिवेदन पेस गर्दै पार्टी नेतृत्व नछाड्ने अडान लिनुभएको छ। ललितपुरको भनिमण्डलस्थित रामवाग पार्टी प्यालेसमा बसेको यो बैठक गत फागुनको प्रतिनिधिसभा निर्वाचनपछिको पहिलो केन्द्रीय कमिटी बैठक हो। पार्टीको पुनर्निर्माण, लोकतन्त्रको रक्षा र राष्ट्रिय स्वाधीनतामा केन्द्रित प्रतिवेदनमा उहाँले आफूलाई अध्यक्ष पदबाट हटाउने प्रयासलाई 'बेमौसमी बाजा' भन्नुभएको छ।

पुनर्गठन रहर वा लहडमा होइन, असामान्य परिस्थितिमा बाध्यतावश मात्र हुने उहाँको तर्क छ। कम्युनिस्ट आन्दोलनको इतिहासका ३ पुनर्गठनको उदाहरण दिँदै उहाँले केशरजंग रायमाझी दरबारतर्फ लागेपछिको अवस्था र झापा आन्दोलनको प्रसङ्ग उल्लेख गर्नुभएको छ। चुनावी पराजयको नैतिक जिम्मेवारी लिने तर सङ्कटका बेला जिम्मेवारीबाट भाग्न नमिल्ने अध्यक्ष ओलीको भनाइ छ।

आफ्नो आलोचना स्वीकार्ने तर चरित्रहत्या नसहने पनि उहाँले बताउनुभएको छ। युवा पुस्ताले एमालेको कुरा सुन्नुअघि नै नकारात्मक धारणा बनाइसकेको प्रतिवेदनमा स्वीकार गरिएको छ। उहाँले भदौ १० गतेको भोटेकोशी बाढीपछिको उद्धार र राहतमा सरकार असफल भएको आरोप पनि लगाउनुभएको छ।

पार्टीको प्रचार तथा प्रकाशन विभाग प्रमुख निरज आचार्यले मङ्गलबार बिहान ९ बजेदेखि प्रतिवेदनमाथि छलफल हुने र प्रत्येक केन्द्रीय सदस्यलाई ३ मिनेट समय दिइने जानकारी दिनुभएको छ। बैठक असोज ७ गतेसम्म चल्नेछ।