आज र भोलि पश्चिमी प्रदेशमा भारी वर्षा, लुम्बिनी–सुदूरपश्चिममा अति भारीको सम्भावना

जल तथा मौसम विज्ञान विभागका अनुसार आज लुम्बिनी र सुदूरपश्चिम प्रदेशका एक–दुई ठाउँमा अति भारी वर्षा हुन सक्छ। आज बागमती, गण्डकी, लुम्बिनी, कर्णाली र सुदूरपश्चिमका सीमित स्थानमा भारीदेखि धेरै भारी पानी पर्ने सम्भावना छ। भोलि गण्डकी, लुम्बिनी, कर्णाली र सुदूरपश्चिममा यस्तै भारी वर्षाको पूर्वानुमान छ भने कोशी र बागमतीका एक–दुई ठाउँमा भारी पानी पर्न सक्छ।

पश्चिमका चार प्रदेशका हिमाली क्षेत्रमा धेरैजसो ठाउँमा चट्याङसहित मध्यम वर्षा वा हिमपात हुन सक्ने विभागले उल्लेख गरेको छ। मधेश र बागमती, गण्डकी तथा लुम्बिनीका तराईका केही भागमा हावाहुरी चल्न सक्छ। अहिले देशभर मनसुनी वायुसँगै पश्चिमी वायुको आंशिक असर छ।

भारतको उत्तर महाराष्ट्र र छत्तिसगढ आसपास रहेको बलियो न्यून चापीय प्रणाली उत्तर–उत्तरपश्चिमतर्फ सर्दै २४ घण्टाभित्र कमजोर हुने अनुमान छ। वीरेन्द्रनगर, नेपालगञ्ज र पोखरामा चट्याङसहित भारी वर्षाको सम्भावना ९० प्रतिशत छ। पोखराको तापक्रम १९ देखि २१, नेपालगञ्जको २१ देखि २३ र वीरेन्द्रनगरको १८ देखि २० डिग्री सेल्सियस रहने अनुमान छ।

काठमाडौँ, विराटनगर र जनकपुरमा मध्यम वर्षाको सम्भावना ६० प्रतिशत छ। काठमाडौँको तापक्रम १६ देखि १८, विराटनगरको २२ देखि २४ र जनकपुरको २१ देखि २३ डिग्री सेल्सियस रहने विभागले जनाएको छ।