मैत्रीपूर्ण फुटबलमा भारत र पानामा १–१ ले बराबरी

अन्तर्राष्ट्रिय मैत्रीपूर्ण फुटबल खेलमा भारत र पानामाबीचको भिडन्त १–१ गोलको बराबरीमा टुंगिएको छ। शुक्रबार बैंग्लुरुस्थित श्री कान्तिरवा रंगशालामा भएको खेलमा भारतलाई रायन विलियम्सले अग्रता दिलाएका थिए। खेलको ४१औँ मिनेटमा आकाश मिश्राको लामो पास समातेर पानामाको रक्षापंक्ति पार गरेका विलियम्सले गोलरक्षक मार्कोस रेयेसलाई छल्दै गोल गरे।

दोस्रो हाफको ६८औँ मिनेटमा ओमार भ्यालेन्सियाले गोल गर्दै पानामालाई बराबरीमा ल्याए। भारतले अब अक्टोबर ३ मा कोलकातामा ब्राजिलसँग मैत्रीपूर्ण खेल खेल्नेछ। त्यसको ३ दिनपछि भारतको सामना उरुग्वेसँग हुनेछ।