बाढीपहिरोले १,३०३ मेगावाट बिजुली आपूर्ति अवरुद्ध

केही दिनदेखिको अविरल वर्षा र बाढीपहिरोले देशको विद्युत् प्रणालीमा ठूलो क्षति पुर्‍याएको छ। ऊर्जा, जलस्रोत तथा सिँचाइ मन्त्रालयका अनुसार १ हजार ३०३ मेगावाट बराबरको बिजुली आपूर्ति अवरुद्ध भएको छ। कालीगण्डकी करिडोरको २२० केभी प्रसारण लाइन बिग्रँदा करिब २०० मेगावाट उत्पादन रोकिएको छ।

राहुघाट र राहुगंगा जलविद्युत् आयोजनाका संरचना तथा प्रसारण टावर बाढीले क्षतिग्रस्त बनाएको छ। सर्लाहीको मलंगवा सबस्टेसनमा पानी पसेपछि १० स्थानीय तहमा बत्ती गएको छ। मनाङमा पहिरोले ३३ केभी लाइन अवरुद्ध भएको छ।

सल्यान जिल्ला तीन दिनदेखि विद्युत्विहीन छ। बिजुली नहुँदा एनसेलका करिब १५० टावर बन्द भएका छन्। नेपाल विद्युत् प्राधिकरणले मर्मतका लागि प्राविधिक टोली खटाएको छ।