कुलेखानी क्षेत्रमा तीन ठाउँमा पूर्वसूचना साइरन, बाँध ओभरफ्लो रोक्न सतर्कता

भारी वर्षाको पूर्वानुमानसँगै मकवानपुरको कुलेखानी क्षेत्रमा बाढीको पूर्वसूचना दिन तीन ठाउँमा साइरन जडान गरिएको छ। मकवानपुर प्रशासनले इन्द्रसरोवर गाउँपालिकास्थित जलाशयको बाँध, सिस्नेरी प्रहरी चौकी र गाउँपालिकाको कार्यालयमा साइरन राखेको छ। लगातारको वर्षाले जलसतह बढेमा सर्वसाधारणलाई तुरुन्तै खबर दिन यो व्यवस्था गरिएको हो।

कुलेखानी प्रथम जलविद्युत् केन्द्रका प्रमुख प्रल्हाद राउतका अनुसार आज जलाशयको सतह करिब १ हजार ५२२ मिटरमा छ, जुन सामान्य अवस्था हो। सतह करिब १ हजार ५२७ मिटर पुगेमा पहिलो चेतावनी साइरन बजाइनेछ। जलाशय भरिन नदिन माथिबाट आउने केही सहायक खोलाको पानी अन्यत्र मोडिएको नेपाल विद्युत् प्राधिकरणका प्रवक्ता राजन ढकालले बताउनुभएको छ।

पानीको सतह घटाउन आयोजनालाई पूर्ण क्षमतामा चलाइएको छ। करिब १०६ मेगावाट जडित क्षमताको कुलेखानी देशको एकमात्र जलाशययुक्त जलविद्युत् आयोजना हो। अहिले अवस्था पूर्ण रूपमा नियन्त्रणमा रहेको आयोजना प्रमुख राउतले जनाउनुभएको छ।

जल तथा मौसम विज्ञान विभागका अनुसार आज र भोलि बागमती प्रदेशका थोरै स्थानमा भारी देखि धेरै भारी वर्षाको सम्भावना छ।