प्रधानमन्त्री राहत कोषमा साढे १५ अर्ब मौज्दात, बाढी प्रभावितलाई निकासा

प्रधानमन्त्री दैवी प्रकोप उद्धार कोषमा करिब १५ अर्ब ५३ करोड रुपैयाँ मौज्दात रहेको प्रधानमन्त्री तथा मन्त्रिपरिषद्को कार्यालयले जनाएको छ। यो रकम दैवी प्रकोप उद्धार कोष र प्रधानमन्त्री राहत कोषका सबै खाता जोडेर निकालिएको हो। रसुवामा भदौ १० गते भोटेकोशीमा बाढी आएपछि सरकारले प्रभावितको राहत र उद्धारका लागि यस कोषमा सहयोग माग गरेको थियो।

कुल रकममध्ये करिब ११ अर्ब ६३ करोड रुपैयाँ ९ वटा वाणिज्य बैंकका खातामा छ। हिमालयन बैंक र लक्ष्मी सनराइज बैंकका डलर खातामा करिब २ करोड ५४ लाख अमेरिकी डलर जम्मा छ। नेपाल राष्ट्र बैंकका अनुसार आज १ अमेरिकी डलरको खरिद दर १५२ रुपैयाँ ८९ पैसा र बिक्री दर १५३ रुपैयाँ ४९ पैसा कायम छ।

खरिद दरमा हिसाब गर्दा डलर खाताको रकम करिब ३ अर्ब ८९ करोड रुपैयाँ बराबर हुन्छ। प्रभावित क्षेत्रको उद्धार र राहतका लागि यस कोषबाट राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई करिब १ अर्ब रुपैयाँ पठाइसकिएको छ। सहयोग आउने क्रम जारी रहँदा पछिल्लो २४ घण्टामै कोषमा करिब २० करोड ७२ लाख रुपैयाँ थपिएको कार्यालयले जनाएको छ।