रचिन रविन्द्रको काँधमा चोट, भारतविरुद्धको शृङ्खला खेल्नेमा अन्योल

न्युजिल्यान्डका अलराउन्डर रचिन रविन्द्रको दाहिने काँधमा चोट लागेपछि भारतविरुद्धको घरेलु टी–ट्वान्टी शृङ्खलामा उहाँको सहभागिता अन्योलमा परेको छ। यसै साताको सुरुमा अक्ल्यान्डमा एउटा प्रचार भिडियोको छायाङ्कन गर्दा डाइभ गरेर क्याच समात्न खोज्ने क्रममा उहाँ सुरक्षा म्याटमा असन्तुलित भई खस्नुभएको थियो। उहाँ कहिलेसम्म खेलबाट टाढा रहनुहुन्छ भन्ने कुरा न्युजिल्यान्ड क्रिकेटले अहिलेसम्म खुलाएको छैन।

संस्थाका अनुसार उहाँको पुनरागमन पुनर्स्थापनाको पहिलो चरणमा हुने सुधारमा भर पर्नेछ। शृङ्खला अक्टोबर २२ देखि सुरु हुँदैछ र त्यसका लागि न्युजिल्यान्डले अर्को साता टोली घोषणा गर्ने तयारी गरेको छ। न्युजिल्यान्डका प्रदर्शन व्यवस्थापक माइक स्यान्डलले रविन्द्रको चोटलाई दुर्भाग्यपूर्ण भन्नुभएको छ।

खेलाडीलाई पूर्ण रूपमा ठिक बनाएर फर्काउनु टोलीको पहिलो प्राथमिकता भएको उहाँले बताउनुभएको छ। मुख्य प्रशिक्षक रोब वाल्टरका अनुसार टोली रविन्द्रलाई छिटो फर्काउन हतारिने छैन।