देशभर बादल, कोशी, बागमती र गण्डकीका पहाडी भेगमा भारी वर्षाको सम्भावना

जल तथा मौसम विज्ञान विभागले आज देशभर साधारणतया बादल लाग्ने र कोशी, बागमती तथा गण्डकी प्रदेशका हिमाली र पहाडी क्षेत्रका एक-दुई ठाउँमा भारी वर्षा हुनसक्ने जनाएको छ। विभागले बिहान ८ बजे जारी गरेको पूर्वानुमानअनुसार अहिले देशमा मनसुनी वायुसँगै पश्चिमी वायुको पनि आंशिक असर परेको छ। मनसुनको न्यून चापीय रेखा सामान्य स्थानभन्दा दक्षिणतिर रहेको छ।

आज पहाडी भू-भागका केही स्थान र तराईका थोरै स्थानमा मेघगर्जन र चट्याङसहित मध्यमसम्म वर्षा हुने सम्भावना छ। हिमाली भेगमा भने कोशी, बागमती र गण्डकीका केही तथा लुम्बिनी, कर्णाली र सुदूरपश्चिमका थोरै स्थानमा वर्षा वा हिमपात हुनसक्छ। काठमाडौँ, पोखरा, वीरेन्द्रनगर र नेपालगञ्जमा आज वर्षाको सम्भावना ४० प्रतिशत तथा विराटनगर र जनकपुरमा ३० प्रतिशत रहेको छ।

तापक्रम जनकपुरमा ३३, विराटनगर र नेपालगञ्जमा ३१, पोखरामा २९, वीरेन्द्रनगरमा २८ र काठमाडौँमा २७ डिग्री सेल्सियस रहने अनुमान छ। भोलि हिमाली र पहाडी क्षेत्रमा साधारणतया बादल लाग्ने र तराईमा आंशिक बदली रहने पूर्वानुमान छ। सोही दिन कोशी, बागमती, गण्डकी र कर्णालीका हिमाली क्षेत्रका थोरै स्थानमा वर्षा वा हिमपात हुनसक्ने विभागले जनाएको छ।

कोशी, बागमती, गण्डकी र लुम्बिनीका पहाडी भागका थोरै स्थान तथा तराईका एक-दुई ठाउँमा मेघगर्जनसहित मध्यमसम्म वर्षा हुने अनुमान छ।