क्यानडाली मदिरासहितका उत्पादनमा अमेरिकी प्रतिबन्ध लागू

अमेरिका र क्यानडाबीच व्यापार तनाव चर्किरहेका बेला अमेरिकाले क्यानडाबाट भित्रिने मदिराजस्ता उत्पादनमा मङ्गलबारदेखि नयाँ प्रतिबन्ध लगाएको छ। राष्ट्रपति डोनाल्ड ट्रम्पले यही महिनाको सुरुमा घोषणा गर्नुभएको प्रतिबन्धको दायरामा बियर, स्पार्कलिङ वाइन, ब्रान्डी र सेकजस्ता पेयपदार्थका साथै दुग्धजन्य मट्ठा प्रोटिन र उच्च क्षमताका मोटरसाइकल परेका छन्। सेप्टेम्बर ८ मा क्यानडाले अमेरिकी वस्तुमा करिब २० अर्ब अमेरिकी डलर बराबरको जवाफी शुल्क लगाएपछि अमेरिकाले यो कदम चालेको हो।

राष्ट्रपति ट्रम्पले यो निर्णय अमेरिकी सामानप्रति क्यानडाले गरेको 'भेदभावपूर्ण' व्यवहारको प्रत्युत्तर भएको बताउनुभएको छ। अगस्टमा वासिङ्टनमा भएको व्यापार वार्ता निष्कर्षविना टुंगिएपछि दुई छिमेकीबीचको विवाद झन् गहिरिएको हो। क्यानडाले आफ्नो झन्डै ६० प्रतिशत आयात अमेरिकाबाट गर्छ भने झन्डै ७० प्रतिशत निर्यात अमेरिकी बजारमै पठाउँछ।

क्यानडा सरकारले प्रभावित व्यवसायी र कामदारलाई सघाउन करिब ५ अर्ब ४० करोड अमेरिकी डलरको राहत कार्यक्रम घोषणा गरेको छ। गत वर्ष अमेरिकाले क्यानडाबाट करिब ८० करोड अमेरिकी डलर बराबरको मदिरा आयात गरेको थियो। अन्तर्राष्ट्रिय सञ्चारमाध्यमका अनुसार राष्ट्रपति ट्रम्पले यो कदम चाल्न सन् १९३० को स्मूट–हाउली ट्यारिफ ऐन प्रयोग गर्नुभएको हो।

४ लिटरभन्दा ठूला भाँडामा भित्रिने ह्विस्की र लिकरलाई भने प्रतिबन्ध र भन्सार शुल्कबाट छुट दिइएको छ। अमेरिकी व्यवसायीहरूले प्रतिबन्धअघि नै ठूलो परिमाणमा मौज्दात जम्मा गरेको बताइएको छ।