बाढीप्रभावित सबै जिल्लामा बुधबारसम्म बिजुली फर्किने, कालीगण्डकी 'ए' सञ्चालनको तयारी

बाढीपहिरोका कारण अवरुद्ध विद्युत् आपूर्ति सबै प्रभावित जिल्लामा बुधबारसम्म सुचारु हुने नेपाल विद्युत् प्राधिकरणले जनाएको छ। प्राधिकरणका कार्यकारी निर्देशक दीर्घायु कुमार श्रेष्ठले सोमबार पत्रकार सम्मेलनमा यसबारे जानकारी दिनुभएको छ। उहाँका अनुसार असोज ९ देखि परेको लगातार वर्षाले करिब १ हजार मेगावाटभन्दा बढी क्षमताका जलविद्युत् केन्द्र प्रणालीबाट बाहिरिँदा आइतबार दिनभर असहज अवस्था बनेको थियो।

म्याग्दी, बागलुङ, तनहुँ र रुकुम पूर्वमा बत्ती फर्किसकेको छ भने मुस्ताङ, प्युठान र डोल्पामा सोमबार अपराह्नसम्म आपूर्ति सुचारु हुने प्राधिकरणको भनाइ छ। बाढीका कारण करिब २३० मेगावाट क्षमताका ८ वटा आयोजना प्रणालीबाट पूर्ण रूपमा बाहिरिएका छन्। प्राधिकरणका अनुसार सेती–मादी करिडोरका करिब २६२ मेगावाट र मर्स्याङ्दी करिडोरका करिब १९० मेगावाट क्षमताका जलविद्युत् केन्द्र फेरि उत्पादनमा फर्किसकेका छन्।

नदीको बहाव बढेपछि जोखिम टार्न बन्द गरिएको स्याङ्जाको बेल्टारीस्थित करिब १४४ मेगावाटको कालीगण्डकी ‘ए’ आयोजनाले सोमबारदेखि उत्पादन फेरि सुरु गर्ने तयारी गरेको छ। म्याग्दीको दाना–कुश्मा खण्डमा कालीगण्डकी करिडोरको प्रसारण लाइनका दुई टावर क्षतिग्रस्त हुँदा त्यस क्षेत्रका सात वटा जलविद्युत् केन्द्रले बिजुली पठाउन सकेका छैनन्। करिब ४० मेगावाटको राहुघाट आयोजनाको टेलरेस गेट, डम्प र टर्बाइन फ्लोरमा पानी पसेकाले यसलाई फेरि चलाउन झन्डै १० दिन लाग्ने प्राधिकरणको अनुमान छ।

यद्यपि आयोजनाको स्विचयार्ड भने चालु भइसकेको छ।