सेयर कारोबारमा पुँजीगत लाभकर घटाउने सरकारको निर्णय

सरकारले सेयर बिक्रीबाट प्राप्त नाफामा लाग्दै आएको पुँजीगत लाभकरको दर घटाएको छ। बुधबार बसेको मन्त्रिपरिषद् बैठकले अर्थ मन्त्रालयको 'पुँजी बजार सुदृढीकरण तथा पुनरुत्थान कार्ययोजना २०८३' कार्यान्वयन गर्ने क्रममा यो निर्णय गरेको सरकारका प्रवक्ता सस्मित पोखरेलले बताउनुभएको छ। नयाँ व्यवस्थाअनुसार ३६५ दिन वा सोभन्दा कम अवधि सेयर राखेर बेच्ने व्यक्तिगत लगानीकर्ताले नाफामा ५ प्रतिशत अग्रिम कर तिर्नुपर्नेछ।

यसअघि यस्तो दर १० प्रतिशत थियो। ३६५ दिनभन्दा लामो समय सेयर राख्नेका हकमा साविकको साढे ७ प्रतिशत कर करिब आधाले घटाइएको छ। जेठ १५ गते ल्याइएको चालु आर्थिक वर्ष २०८३/८४ को बजेटमार्फत सरकारले यो कर बढाएको थियो।

अर्थमन्त्री डा. स्वर्णिम वाग्लेले सोमबार सेयर बजार सुधारका लागि २१ बुँदे कार्ययोजना सार्वजनिक गर्दै लाभकर आधा घटाउने घोषणा गर्नुभएको थियो। मन्त्रिपरिषद्को यो निर्णय नेपाल राजपत्रमा प्रकाशित भएपछि कार्यान्वयनमा आउनेछ।

उही बैठकले सरकारी निर्णय प्रक्रिया सरलीकरण तथा डिजिटल बनाउनेसम्बन्धी नियमावली २०८३ र चक्रीय राहत कोष सञ्चालन कार्यविधि पनि स्वीकृत गरेको छ। बैठकले न्याय सेवाका ठगिन्द्र कट्टेल, रामप्रसाद भट्टराई र बाबुराम दाहाल तथा प्रशासन सेवाका कालीप्रसाद पराजुलीलाई सहसचिवबाट सचिवमा बढुवा गरेको छ।