प्रकोप उद्धार कोषमा रकम थपिँदै, चौबीस घण्टामै करिब २३ करोड

प्रधानमन्त्री दैवी प्रकोप उद्धार कोषमा पछिल्लो २४ घण्टामा करिब २३ करोड रुपैयाँ थपिएको छ। प्रधानमन्त्री तथा मन्त्रिपरिषद्को कार्यालयका अनुसार बुधबारको तुलनामा बिहीबार कोषमा करिब २२ करोड ७५ लाख ३८ हजार रुपैयाँ थपिएको हो। सोही कार्यालयका अनुसार बिहीबार साँझसम्म कोषका विभिन्न नौवटा बैंकमा रहेको मौज्दात रकम करिब १० अर्ब ८९ करोड ६६ लाख रुपैयाँ पुगेको छ।

त्यस्तै, कोषका दुईवटा बैंकमा रहेको डलर खातामा करिब दुई करोड ३९ लाख ३० हजार अमेरिकी डलर जम्मा भएको छ। सबै खाता गरी कोषमा करिब १४ अर्ब ५६ करोड ३८ लाख रुपैयाँ मौज्दात रहेको कार्यालयले जनाएको छ। कोषमा जम्मा भएको रकमबाट रसुवाको भोटेकोशी नदीमा आएको बाढीबाट प्रभावित परिवारका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत करिब एक अर्ब रुपैयाँ निकासा भइसकेको छ।

सरकारले रसुवाका बाढीप्रभावित परिवारलाई आवास भाडा र अन्य आवश्यक खर्च व्यवस्थापनका लागि मासिक रकम उपलब्ध गराउने निर्णय गरिसकेको छ। सो निर्णयअनुसार चार सदस्यसम्मको परिवारलाई मासिक करिब १५ हजार रुपैयाँ र थप प्रत्येक सदस्यका लागि करिब दुई हजार रुपैयाँ अतिरिक्त उपलब्ध गराइनेछ।