युरोपेली फुटबल: म्याड्रिड डर्बीमा एट्लेटिको विजयी, सिटीको ५–३ को जित

स्पेनिस ला लिगाको म्याड्रिड डर्बीमा एट्लेटिको म्याड्रिडले रियल म्याड्रिडलाई २–१ ले पराजित गरेको छ। पहिलो हाफ गोलरहित बराबरीमा सकिएको खेलमा रियलका डिफेन्डर डिन हुइजसेनले ५२औँ मिनेटमा रातो कार्ड पाएका थिए। १० खेलाडीमा सीमित रियलविरुद्ध ५३औँ मिनेटमा अलेहान्द्रो ग्रिमाल्डोले पेनाल्टीबाट गोल गर्दै एट्लेटिकोलाई अग्रता दिलाए।

५९औँ मिनेटमा जियोभानी सिमियोनेको पासमा जोनाथन डेभिडले दोस्रो गोल थपेका छन्। रियलका एन्टोनियो रुडिगरले अन्तिम समयमा एक गोल फर्काए पनि टोलीले हार टार्न सकेन। यो जितसँगै एट्लेटिको ७ खेलबाट १६ अंक जोड्दै दोस्रो स्थानमा उक्लिएको छ।

उता इङ्लिस प्रिमियर लिगमा म्यान्चेस्टर सिटीले घरेलु मैदान इतिहादमा सन्डरल्यान्डलाई ५–३ ले हराएको छ। सिटीका एन्टोइन सेमेन्योले २ गोल गर्दा रायन चेर्की, एन्जो फर्नान्डेज र एर्लिङ हालान्डले १–१ गोल गरेका छन्। खेलको नवौँ मिनेटमा एन्जोले सिटीलाई अग्रता दिलाएका थिए भने १२औँ मिनेटमा ब्रोबेले बराबरी गोल फर्काएका थिए।

सन्डरल्यान्डका ब्रायन ब्रोबेले ह्याट्रिक गरे पनि टोली हारबाट जोगिन सकेन। जितपछि सिटी ५ खेलमा १५ अंकसहित शीर्षस्थानमा पुगेको छ। अर्को खेलमा म्यान्चेस्टर युनाइटेडले फुलहमसँग १–१ को बराबरी खेलेको छ।

६३औँ मिनेटमा लिसान्ड्रो मार्टिनेजको आत्मघाती गोलपछि पछि परेको युनाइटेडले अन्तिम समयमा बराबरी गोल फर्काएको हो। यो बराबरीसँगै युनाइटेड तालिकाको १२औँ स्थानमा उक्लिएको छ। ला लिगाकै अर्को खेलमा भिल्लारियलले लेभान्टेलाई ३–१ ले हराउँदै आठौँ स्थानमा उक्लिएको छ।