सरकारको कार्यशैलीले देश सङ्कटतर्फ: प्रतिपक्षी नेता आङदेम्बे

कांग्रेस संसदीय दलका नेता एवं प्रमुख प्रतिपक्षी नेता भीष्मराज आङदेम्बेले सरकारको कामकाज अपारदर्शी र अराजक हुँदा देश गम्भीर सङ्कटतिर धकेलिएको आरोप लगाउनुभएको छ। सोमबार पाँचथरमा भएको कांग्रेसको प्रदेश क्षेत्रीय अधिवेशनमा बोल्दै उहाँले लोकतान्त्रिक मूल्य, विधि र प्रक्रियाप्रति सरकार गम्भीर नदेखिएको बताउनुभएको छ। राज्यका निकायहरू कानुन र स्थापित प्रक्रियाअनुसार सञ्चालन हुनुपर्नेमा सरकार उल्टो दिशामा हिँडिरहेको उहाँको आरोप छ।

नेता आङदेम्बेका अनुसार सरकारी गतिविधि पारदर्शी नहुँदा नागरिकमा आशङ्का र निराशा बढेको छ। पारदर्शिता र विधिको शासन झन् कमजोर भए मुलुक गम्भीर सङ्कटमा फस्ने चेतावनी उहाँले दिनुभएको छ। सरकारको कार्यशैलीले लोकतान्त्रिक व्यवस्थाकै मर्ममाथि प्रश्न खडा गरेको पनि उहाँले बताउनुभएको छ।

सरकारले आफ्ना निर्णयमा जनताप्रति जवाफदेहिता नदेखाएको उहाँले औँल्याउनुभएको छ।