छुजुङ खोला जलविद्युत् आयोजनामा माछापुच्छ्रे बैंकको अगुवाइमा ९ अर्ब ऋण

संखुवासभाको भोटखोला गाउँपालिका–२ मा निर्माणाधीन छुजुङ खोला जलविद्युत् आयोजनाका लागि माछापुच्छ्रे बैंकको अगुवाइमा ६ बैंक तथा वित्तीय संस्थाले करिब ९ अर्ब रुपैयाँ ऋण लगानी गर्ने सम्झौता गरेका छन्। सांग्रिला ऊर्जा लिमिटेडले निर्माण सुरु गरेको यो आयोजना ६३ मेगावाट क्षमताको अर्धजलाशययुक्त प्रकृतिको हो। सहवित्तीयकरणमा प्रभु बैंक र लुम्बिनी विकास बैंक सह–अगुवा छन् भने मुक्तिनाथ विकास बैंक, एनआईसी एशिया बैंक र सांग्रिला डेभलपमेन्ट बैंक सदस्य बैंकका रूपमा सहभागी छन्।

आयोजनाको कुल लागत करिब १२ अर्ब रुपैयाँ अनुमान गरिएको छ। ऋणबाहेकको करिब ३ अर्ब रुपैयाँ घलेम्ली हाइड्रो लिमिटेडलगायत संस्थापकले स्वपुँजीका रूपमा लगानी गर्नेछन्। भदौ १० को भोटेकोशी बाढीपछि वित्तीय व्यवस्थापन टुंगिएको यो सम्भवतः पहिलो जलविद्युत् आयोजना हो।