चिनियाँ राष्ट्रपति सी वासिङ्टनमा, ट्रम्पद्वारा विशेष स्वागतको तयारी

चिनियाँ राष्ट्रपति सी जिनपिङ तीन दिने राजकीय भ्रमणका लागि बुधबार अमेरिकी राजधानी वासिङ्टन पुग्ने भएका छन्। एक दशकभन्दा बढी समयपछि हुन लागेको यो उहाँको पहिलो अमेरिका भ्रमण हो। अमेरिकी राष्ट्रपति डोनाल्ड ट्रम्प स्वयं एन्ड्रयूज एयर फोर्स बेसमा उहाँलाई स्वागत गर्न पुग्ने कार्यक्रम रहेको जनाइएको छ।

सी र उहाँकी पत्नी पेङ लियुआनको सम्मानमा बिहीबार ह्वाइट हाउसमा औपचारिक स्वागत समारोह हुनेछ। समारोहमा सैन्य विमानबाट फ्लाईओभर गरिनेछ भने अमेरिकी सेनाका करिब ५ सय जना सहभागी हुनेछन्। बिहीबार साँझ ट्रम्पले सीको सम्मानमा राजकीय रात्रिभोज आयोजना गर्नेछन्।

भ्रमणका क्रममा औपचारिक कार्यक्रमसँगै निजी भेटघाट र अन्य कार्यक्रम पनि हुनेछन् भने भ्रमण शुक्रबार समाप्त हुनेछ। दुवै पक्षबीच व्यापार, भन्सार, दुर्लभ पृथ्वी, कृत्रिम बुद्धिमत्ता, ताइवान र इरानलगायत विषयमा छलफल हुने अपेक्षा गरिएको छ। सन् २०२५ को अक्टोबरमा दक्षिण कोरियामा भएको भेटमा तय भएको व्यापार सम्झौताको अवधि नोभेम्बरमा सकिँदैछ, त्यसैले सम्झौताको निरन्तरताबारे पनि कुराकानी हुने अपेक्षा छ।

कृत्रिम बुद्धिमत्ताको विकासमा दुई देशबीच तीव्र प्रतिस्पर्धा रहेको र यस प्रविधिले निम्त्याउने जोखिम कसरी घटाउने भन्नेबारे दुवै पक्षले विचारविमर्श गरिरहेका छन्। भेटअघि गत सप्ताहान्त अमेरिकी अर्थमन्त्री स्कट बेसेन्टले चिनियाँ समकक्षी ह लिफेङसँग छलफल गरेका थिए।