मदन भण्डारी राजमार्ग: रिडी–तम्घास २५ किलोमिटर कालोपत्रे

गुल्मीमा मदन भण्डारी राजमार्गको रिडी–तम्घास खण्डअन्तर्गत रिडीदेखि बीरबाससम्मको २५ किलोमिटर सडक कालोपत्रे भएको छ। स्तरोन्नति, ढलान र कालोपत्रेको यो काम तोकिएकै समयमा सकिएको मदन भण्डारी राजमार्ग योजना कार्यालय गुल्मीले जनाएको छ। कार्यालयका सूचना अधिकारी इन्जिनियर प्रभात तिवारीका अनुसार समानान्तर–एलाइट जेभीले २०७९ फागुन २६ मा करिब एक अर्ब ६५ करोड रुपैयाँमा सम्झौता गरेको थियो।

अहिले यो खण्ड निर्माण व्यवसायीले त्रुटि सच्याउनुपर्ने अवधिमा छ। सडकले रुरुक्षेत्र र छत्रकोट गाउँपालिकाका बजार क्षेत्र जोडेको छ। इस्मा गाउँपालिका–४ का गाडी चालक बसन्त खड्काका अनुसार रिडी–तम्घास पुग्न लाग्ने झन्डै साढे दुई घण्टा अब एक घण्टामा झरेको छ।

घुम्ती र साँघुरो सडकका कारण पहिले दुर्घटनाको जोखिम उच्च रहेको उहाँले बताउनुभएको छ। रुरुक्षेत्र गाउँपालिकाका अध्यक्ष यदु ज्ञवालीले पालिकाका पहुँचमार्ग जोडिँदा नागरिकलाई सुविधा भएको बताउनुभएको छ। दोस्रो खण्डमा बीरबास राजाक्षेत्रको करिब पौने दुई किलोमिटर सडकमा करिब ११ करोड रुपैयाँ लागतमा काम भइरहेको छ, जसको भौतिक प्रगति करिब ३७ प्रतिशत पुगेको छ।

यो काम २०८३ माघ २५ भित्र सक्नुपर्ने छ। गौडाकोट–देउराली खण्डको बोलपत्र मूल्याङ्कन भइरहेको छ। तर पश्चिम गुल्मीको सिमलटारीदेखि प्युठानको मच्छिसम्म करिब ३२ किलोमिटर सडकमा श्रेष्ठ सक्षम जेभीले चार वर्षमा करिब ३३ प्रतिशत मात्र काम गरेको छ।