अफगानिस्तानमा यो हिउँद १ करोड ९२ लाख मानिसलाई चरम खाद्य असुरक्षाको जोखिम: राष्ट्रसङ्घ

संयुक्त राष्ट्रसङ्घका अनुसार यस हिउँदमा अफगानिस्तानका १ करोड ९२ लाख मानिस चरम खाद्य असुरक्षाको चपेटामा पर्नेछन्। यीमध्ये झन्डै ५० लाख मानिसको अवस्था भोकमरीको आपत्कालीन तहसम्म पुग्न सक्ने आकलन छ। राष्ट्रसङ्घको मानवीय सहायता समन्वय कार्यालय ओचाका अनुसार नोभेम्बरदेखि अप्रिलसम्मको कठोर जाडोमा खाद्य सङ्कट अझ चर्किन सक्छ, र यसको सबैभन्दा ठूलो मार बालबालिका र गरिब परिवारमा पर्नेछ।

ओचाकी अफगानिस्तानस्थित प्रवक्ता ओल्गा चेरेभकोका अनुसार सेप्टेम्बर र अक्टोबरमा मात्र १ करोड ५९ लाख अफगान नागरिकको खाद्य स्थिति सङ्कटपूर्ण वा त्योभन्दा पनि नराम्रो तहमा थियो। तीमध्ये ३४ लाख मानिस आपत्कालीन स्थितिमा थिए। सहयोग समयमै नपुगे लाखौँ मानिस गम्भीर सङ्कटमा पर्ने उहाँको चेतावनी छ।

तालिबान सत्तामा फर्किएपछि अन्तर्राष्ट्रिय सहायता घटेको छ भने प्राकृतिक विपद्, द्वन्द्व र आर्थिक कठिनाइले मानवीय सङ्कटलाई थप जटिल बनाएका छन्।