एसियाली पारा खेलकुद: तेक्वान्दोमा पलेशा गोवर्धन पदकबाट चुकिन्

जापानको आइची–नागोयामा भइरहेको पाँचौँ एसियाली पारा खेलकुदमा नेपाली पारा तेक्वान्दो खेलाडी पलेशा गोवर्धन पदक जित्नबाट चुकेकी छन्। महिला के–४४ विधाको ५७ केजीमुनि तौल समूहको कांस्य पदक भिडन्तमा उनी इरानकी मरियम अब्दुल्लापोर डेरोईससँग १८–६ अङ्कले पराजित भएकी छन्। पहिलो राउन्डमा ४–० ले पछि परेकी पलेशाले दोस्रो राउन्ड पनि १४–६ ले गुमाइन्।

चौथो वरीयताकी १९ वर्षीया मरियम पेरिस पारालिम्पिकमा खेलिसकेकी खेलाडी हुन्। उनले हाङचाउ पारा एसियाडमा ४७ केजीमुनि तौलमा कांस्य जितेकी थिइन्। पहिलो खेल हारेपछि पलेशाले रिपिचेजमार्फत कांस्यका लागि मौका पाएकी थिइन्।

रिपिचेजमा उनले काजाकस्तानकी ३४ वर्षीया कामिल्या दोस्मालोभालाई १४–१० ले हराइन्। हाङचाउको सेमिफाइनलमा पलेशा दोस्मालोभासँगै पराजित भएकी थिइन्, र त्यहाँ दोस्मालोभाले रजत जितेकी थिइन्। यो जितसँग पलेशाले त्यो हारको बदला लिएकी छन्।

हाङचाउ संस्करणमा कांस्य जितेकी पलेशाले यसपालि जापानमा पदक दोहोर्‍याउन सकिनन्।