चाडपर्वमा चोरीसिकार रोक्न चितवन निकुञ्जमा ३५ स्पाई क्यामेरा

चाडपर्वका बेला हुनसक्ने वन्यजन्तुको चोरीसिकार रोक्न चितवन राष्ट्रिय निकुञ्जले निगरानी कडा बनाएको छ। निकुञ्जका संरक्षण अधिकृत गणेशप्रसाद तिवारीका अनुसार जोखिम भएका संवेदनशील क्षेत्रमा करिब ३५ वटा स्पाई क्यामेरा जडान गरिएको छ। अनधिकृत व्यक्ति वा समूह छिर्न सक्ने स्थान पहिचान गरेर क्यामेरा राखिएको उहाँले बताउनुभएको छ।

जोखिमयुक्त क्षेत्रमा क्याम्पिङ र घात लगाएर बस्ने एम्बुसिङ गतिविधि पनि सञ्चालन गरिएको छ। केही वर्षअघि चाडपर्वकै बेला पूर्वी क्षेत्रमा तस्करले खाडल खनेर सिकार गरेको घटना दोहोरिन नदिन निकुञ्ज सतर्क रहेको छ। निकुञ्ज र मध्यवर्ती वन क्षेत्रमा नेपाली सेना र निकुञ्जका कर्मचारीले दिउँसो र राति नियमित तथा आकस्मिक गस्ती गरिरहेका छन्।

गस्ती पैदल, साइकल, हात्ती, डुङ्गा र जिपबाट भइरहेको निकुञ्जले जनाएको छ। शंकास्पद व्यक्तिको गतिविधि नियाल्नुका साथै विगतमा वन्यजन्तु अपराधमा सजाय भोगेर फर्केकाहरूबारे सूचना सङ्कलन भइरहेको छ। तिवारीका अनुसार नयाँ प्रविधिको प्रयोग र तत्काल प्रतिकार्य टोली परिचालनमा जोड दिइएको छ।

समुदायसँग समन्वय र सूचना आदानप्रदानलाई प्राथमिकता दिँदै संरक्षणमा लागेका युवासँग पनि सहकार्य गरिएको छ। असोज २८ गते बसेको चितवन जिल्लास्तरीय वन्यजन्तु अपराध नियन्त्रण एकाइको बैठकपछि सम्बन्धित निकाय मिलेर काम गरिरहेको उहाँले जानकारी दिनुभएको छ।