नारायणी पुलमा अड्किएको राइनो क्रुज निकाल्ने क्रममा पल्टियो

नारायणी नदीको बाढीले बगाएर नारायणी पुलको पिलरमा अड्काएको ‘राइनो क्रुज’ निकाल्ने प्रयास दोस्रो दिन पनि सफल हुन सकेको छैन। आइतबार साँझको बाढीले होटल रिभर क्राउनअगाडि बाँधिएको तीनतले क्रुज बगाएर गैँडाकोटतर्फको पिलरसम्म पुर्‍याएको थियो। क्रुज पिलरमा अड्किँदा पुलमै क्षति पुग्ने जोखिम बढेपछि त्यसलाई गैँडाकोटतर्फको किनारमा तान्ने काम थालिएको हो।

क्रुज तान्न जलविद्युत् आयोजनाको करिब ८० टन क्षमताको क्रेन, नारायणघाट–बुटवल सडक आयोजनाको क्रेन र एउटा एक्साभेटर प्रयोग गरिएको सहायक प्रमुख जिल्ला अधिकारी चिरञ्जीवी रानाले बताउनुभएको छ। उहाँका अनुसार सोमबार क्रुजलाई पिलरबाट उत्तरतिर केही सारेपछि क्रेनको डोरी चुँडिँदा काम रोकिएको छ। तान्ने क्रममा पुलमाथि सवारी आवागमन पूर्ण रूपमा बन्द गरिएको थियो।

प्रशासनका अनुसार भोलि बिहानैदेखि फेरि प्रयास सुरु गरिनेछ। सञ्चालक कम्पनीका अनुसार क्रुजलाई २० मिलिमिटरका दुई डोरीले रुखमा बाँधिएको थियो, तर बाढीमा बगेर आएका ठूला रुखले ठेलेपछि ती डोरी चुँडिएका थिए। भौतिक पूर्वाधारमन्त्री सुनिल लम्सालले क्रुज सुरक्षित रूपमा निकाल्न आवश्यक उपकरण र जनशक्ति खटाइएको जानकारी दिनुभएको छ।