भोटेकोशी बाढीको वैज्ञानिक अध्ययनमा एडीबीसँग सहकार्यबारे छलफल

एसियाली विकास बैंक अर्थात् एडीबीले भोटेकोशी बाढीको वैज्ञानिक अध्ययन र क्षति मूल्याङ्कनमा ऊर्जा मन्त्रालयसँग सहकार्य गर्न तयार रहेको जनाएको छ। एडीबीका नेपाल राष्ट्रिय निर्देशक आर्नो कोशवाले असोज ८ गते ऊर्जा, जलस्रोत तथा सिँचाइमन्त्री विराजभक्त श्रेष्ठसँग भेट गरी यसबारे छलफल गर्नुभएको छ। जलवायु परिवर्तन थेग्न सक्ने विद्युत् पूर्वाधार बनाउन सहकार्य गर्ने विषयमा पनि कुराकानी भएको मन्त्री श्रेष्ठको सचिवालयले जनाएको छ।

मन्त्री श्रेष्ठका अनुसार बाढीको वैज्ञानिक कारण पत्ता लगाउन मन्त्रालयले विज्ञ समिति बनाएर अध्ययन अघि बढाइसकेको छ। भविष्यको करिडोर कस्तो हुनुपर्छ भन्ने प्राविधिक अध्ययनका लागि मन्त्रालयले छुट्टै प्राविधिक टोली पनि गठन गरेको छ। अध्ययन सकिएपछि एकीकृत अवधारणापत्र बनाइने मन्त्री श्रेष्ठले बताउनुभएको छ।

निर्देशक कोशवाले मन्त्रालयका विज्ञ र प्राविधिक टोलीसँग मिलेर काम गर्न एडीबी तयार रहेको बताउनुभएको छ। ऊर्जा क्षेत्रको समग्र विकासमा एडीबीको तर्फबाट वैज्ञानिक र प्राविधिक सहयोग दिने इच्छा पनि उहाँले व्यक्त गर्नुभएको छ।