भोटेकोशी उद्धारमा हेलिकप्टर खर्च: १३ अर्बको चर्चा र वास्तविक हिसाब

भोटेकोशी बाढीपछिको उद्धारमा हेलिकप्टरको १३ देखि १४ अर्ब रुपैयाँ भुक्तानी बाँकी रहेको भनेर सामाजिक सञ्जालमा चलेको चर्चा आफ्नो भनाइको गलत व्याख्या भएको गृहसचिव केदार शर्माले बताउनुभएको छ। प्रधानमन्त्रीको उद्धार कोष र विपद् व्यवस्थापन कोषको रकमबारे संसदीय समितिमा सांसदले सोधेको प्रश्नको जवाफ दिने क्रममा यो विषय उठेको थियो। बाढीपछि देश-विदेशका नेपाली र निजी क्षेत्रको सहयोगले प्रधानमन्त्री दैवी उद्धार कोषमा करिब १६ अर्ब रुपैयाँ जम्मा भइसकेको छ।

गृह मन्त्रालयको विपद् कोषमा करिब १ अर्ब रुपैयाँ मौज्दात छ। त्रिभुवन अन्तर्राष्ट्रिय विमानस्थल कार्यालयको तथ्यांकअनुसार भदौ १० देखि असोज ४ गतेसम्म उद्धार र राहतका लागि करिब ३८५ चार्टर उडान भएका छन्। तीमध्ये करिब २ सय उडान निजी क्षेत्रले र बाँकी सरकारले गरेका हुन्, नेपाली सेनाले भने छुट्टै करिब १४२ उडान गरेको छ।

सरकारले १० वटा हेलिकप्टर कम्पनीका एक-एक हेलिकप्टर भदौभर तयारी अवस्थामा राखेर प्रयोग गरेको थियो। निजी हेलिकप्टरको उडानबापत सरकारले न्यूनतम करिब १० करोड रुपैयाँ तिर्नुपर्ने भएको छ। हिमबाढीले रसुवा, नुवाकोट र धादिङका करिब १५ स्थानीय तहमा असर पारेको छ, जसमा टिमुरे, धुन्चे, बेत्रावत र त्रिशुली बजार बढी प्रभावित छन्।